Më shumë se 1 milion njerëz, përfshirë afro 200 mijë fëmijë, janë dërguar nga Ukraina në Rusi që nga fillimi i pushtimit rus, ka thënë të hënën Ministria e Mbrojtjes e Rusisë, sipas agjencisë shtetërore të lajmeve TASS.
Zyrtari i Ministrisë së Mbrojtjes, Mikhail Mizintsev ka thënë se në 24 orët e mëparshme ata përfshinin 11 mijë e 550 njerëz, përfshirë 1 mijë e 847 fëmijë, “pa pjesëmarrjen e autoriteteve ukrainase”.
Ai ka shtuar se ata civilë “u evakuuan në territorin e Federatës Ruse nga rajonet e rrezikshme” të Donetsk, Lugansk dhe pjesë të tjera të Ukrainës, sipas raportit. Nuk u dhanë detaje mbi vendndodhjen ose rrethanat e lëvizjes.
Gjatë gjithë luftës, Ukraina ka akuzuar trupat e Moskës për marrjen e civilëve kundër vullnetit të tyre në Rusi ose në zonat e kontrolluara nga Rusia, diçka që Kremlini e ka mohuar.
Presidenti ukrainas Volodymyr Zelenskyy, duke folur të hënën për televizionin shtetëror grek ERT, tha se gjysmë milioni ukrainas janë dërguar ilegalisht në Rusi, ose vende të tjera, kundër vullnetit të tyre.