Kryetari i Komunës së Prishtinës, Përparim Rama, në një postim në rrjetin social Facebook, ka njoftuar se kanë filluar punimet në rrugën “Jim Xhema” ose siç njihet ndryshe si rruga “A”.
Rama me këtë rast, u shpreh se ky projekt madhor infrastrukturor për kryeqytetin do ta lidhë Prishtinën e re me Kalabrinë, kështu duke i dhënë fund edhe kundërmimeve nga kanalizimi i hapur.
Veç kësaj, i pari i Prishtinës ka theksuar se kjo rrugë do t’i japë fund edhe rrezikshmërisë për fëmijët, si dhe do të shkarkojë dukshëm ngarkesën e trafikut në kryeqytet.
Rama ishte i shoqëruar edhe nga kryetari i LDK-së, Lumir Abdixhiku.
Tutje, ai ka falënderuar Ministrinë e Mjedisit, Planifikimit Hapësinor dhe Infrastrukturës për bashkëpunimin e komunikimin e hapur dhe qytetarët për durimin.
“Prishtina po frymon më lehtë e më mirë”, ka shkruar Rama.