Kryetari i Aleancës për Ardhmërinë e Kosovës, Ramush Haradinaj, të hënën e 15 majit ka pritur në takim delegacionin nga Partia Popullore Austriake.
Kështu ka bërë të ditur vetë Haradinaj përmes një postimi në Facebook, ku ka thënë se gjatë këtij takimi ka shprehur nevojën për mbështetjen e mëtutjeshme të Austrisë në aspiratën e vendit për integrim euro-atlantik.
Ndërkohë, kreu i AAK-së ka shprehur mirënjohje për angazhimin e Austrisë lidhur me proceset e rëndësishme për Kosovën, përfshirë këtu edhe liberalizimin e vizave.
“Në takim me delegacionin nga Partia Popullore Austriake, në përbërje nga deputetë, këshilltarë dhe zyrtarë tjerë, shpreha mirënjohjen e thellë për angazhimin e tyre të vazhdueshëm në proceset e rëndësishme për Kosovën, veçanërisht në suksesin e arritur në procesin e aplikimit të Kosovës për anëtarësim në Këshillin e Evropës dhe në arritjen e liberalizimit të vizave”, ka thënë ai.
“Gjithashtu, shpreha nevojën për mbështetje të mëtutjeshme të Austrisë në aspiratën tonë për integrim euro-atlantik, arritjen e statusit vend kandidat në BE dhe nisjen e Partneritetit për Paqe”, shtoi Haradinaj.
Po ashtu, gjatë këtij takimi Haradinaj ka theksuar nevojën e thellimit të bashkëpunimit në aspektin politik dhe ekonomik, duke zgjeruar kështu miqësinë e veçantë dhe avancimin e raporteve mes shteteve.