Gjykata Themelore e Ferizajt, ua ka caktuar masën e paraburgimit katër personave të cilët dyshohen se janë marrë me fajde.
Sipas njoftimit, Gjykata në këtë rast ka gjetur se ekziston dyshimi i bazuar se të pandehurit janë marrë me fajde dhe njëri nga me organizimin e skemave piramidale.
Atyre u është caktuar masa e paraburgimit prej një muaji për secilin.
“Gjyqtari i procedurës paraprake i Departamentit për Krime të Rënda kërkesën e prokurorit të shtetit për caktimin e masës së paraburgimit kundër katër (4) të dyshuarve: B.M., A.H., B.K., A.M., e ka aprovuar si të bazuar dhe të njëjtëve i`u është caktuar masë e paraburgimit në kohëzgjatje prej një (1) muaji për secilin veç e veç, konform dispozitave ligjore të Kodit të Procedurës Penale të Republikës së Kosovës, për shkak të dyshimit të bazuar se të pandehurit kanë kryer veprat penale të përshkruara më lartë”, thuhet në njoftim.
Të pandehurit B.M., A.H., B.K dhe A.M., dyshohen se kanë kryer veprat “Fajdeja”, “Detyrimi” dhe “Organizimi i skemave piramidale dhe bixhozit të paligjshëm”.