Kryetari i sapozgjedhur i komunës së Zubin Potokut, Izmir Zeqiri dhe ai i Zveçanit, Ilir Peci, pas takimit me ambasadorin Jeff Hovenier, sipas burimeve të RTV Dukagjinit, kanë shkuar dhe po qëndrojnë në selinë e PDK-së.
Pas takimit me Hovenier, përkundër përpjekjeve, ata nuk kanë qenë të qasshëm për prononcim. Gjatë mëngjesit, kryetari Zeqiri kishte deklaruar se nuk e di a do të shkojë në objekt të komunës në Zubin Potok dhe se një gjë të tillë do ta bëjë të ditur më vonë.
Aktualisht, në tri komunat e veriut po protestohet kundër kryetarëve shqiptarë, të cilët i fituan zgjedhjet e jashtëzakonshme.
Në ato pjesë, përpos Policisë së Kosovës, po qëndrojnë edhe trupat e KFOR-it.
Protestuesit në disa raste kanë tentuar të përplasen me policët e Kosovës, por ata janë kontrolluar mirë nga njësia speciale atje.
Ndryshe, ka pasur sulme të shumta ndaj veturave të mediave, policisë dhe KFOR-it. Në to janë vizatuar simbole fashiste, si dhe disave u janë shpuar edhe gomat.