Federata e Futbollit të Kosovës (FFK) ka reaguar pas polemikave të shumta që shkaktuan dy ndeshjet e xhiros së 36-të. Në duelin Ferizaj – Dukagjin dhe Trepça ’89 – Prishtinë, rezultatet ishin të dyshimta.
Përmes një reagimi, FFK-ja ka bërë të ditur se ka marrë të gjitha informacionet e nevojshme për këto dy ndeshje, të cilat janë më të përfolurat e xhiros së fundit për edicionin 2022/23.
Në reagimin e saj, FFK-ja ka treguar vendosmërinë e saj për të ruajtur imazhin e saj dhe të futbollit të Kosovës, dhe ka reaguar ashpërsisht ndaj çdo lloj njollosjeje dhe akuzash të ngutshme, duke e vlerësuar seriozisht çdo deklaratë dhe dëshmi të mbledhura.
FFK-ja nuk pranon që individë, grupe apo kushdo tjetër të prishin imazhin e saj dhe të futbollit të Kosovës.
- Dyshimet për trukim të ndeshjeve të Superligës, MRKS njofton se kanë nisur hetimet
- Lexo edhe:Prokuroria në Mitrovicë nis hetimet për ndeshjen Trepça’89 – Prishtina
FFK-ja shpreh hapësirën e saj për bashkëpunim me të gjitha organet relevante dhe i inkurajon ato të kryejnë hetim të detajuar për çdo pretendim të parregullt në kampionat.
Ajo ka informuar organet relevante të Republikës së Kosovës dhe u ka ofruar bashkëpunimin e saj në adresimin e çështjes. Po ashtu, ajo ka vendosur të bashkëpunojë me Këshillin Kombëtar për Parandalimin e Dhunës në Sport dhe Prokurorinë e Shtetit për hetimin e pretendimeve të mundshme për kurdisje të ndeshjeve dhe prishje të “fair-play”.
“Federata, në bashkëpunim me Këshillin Kombëtar për Parandalimin e Dhunës në Sport, e nëpërmjet tij edhe me Prokurorinë e Shtetit, do të angazhohet maksimalisht për hetimin e të gjitha pretendimeve për kurdisje të ndeshjeve dhe prishje të “fair-play”. Çdo pretendim që vërtetohet do të ndëshkohet me ashpërsi në përputhje me legjislacionin dhe rregulloret përkatëse”, thuhet në reagim.
Në përfundim të reagimit, FFK-ja konfirmon përkushtimin e saj për të mbrojtur integritetin e garave dhe imazhin e futbollit të Kosovës në përgjithësi. Ajo fton të gjithë protagonistët e futbollit, si zyrtarët, lojtarët, trajnerët, tifozët dhe mediat, që të angazhohen në promovimin e vlerave sportive dhe respektimin e rregullave të lojës.