Kënga “Dance the Night” e këngëtares me prejardhje nga Kosova, Dua Lipa ka kryesuar sondazhin e ri muzikor të kësaj jave.
Fansat e muzikës votuan në një sondazh të publikuar nga revista “Billboard”, duke zgjedhur kolonën zanore të filmit “Barbie”, këngë kjo e interpretuar nga pop ylli 27-vjeçar, si publikimin e ri muzikor të preferuar të javës.
Kënga me tinguj të zhanrit disco – njëherësh singli i parë nga filmi i ardhshëm “Barbie” i regjisores Greta Gerwig – është bashkëshkruar nga Mark Ronson, Caroline Ailin dhe Andrew Wyatt.
Ronson shërben si producent ekzekutiv për albumin me kolonat zanore, i cili zyrtarisht mbanë titullin, “Barbie Album”.
Artistët tjerë që përfshihen në album janë, Nicki Minaj, Ice Spice, Lizzo, Charli XCX dhe PinkPantheress.
Dua Lipa e ka një rol si aktore në këtë projekt të shumëpritur nga publiku, duke e portretizuar një barbie sirenë krahas protagonistëve, Margot Robbie dhe Ryan Gosling.