Shefi i Grupit parlamentar të PDK-së, Abelard Tahiri, e ka akuzuar kryeministrin e Kosovës, Albin Kurti, se me veprimet e fundit në veri të vendit ka shkaktuar vetëm kaos dhe nuk e ka shtrirë sovranitetin e as rendin dhe ligjin.
Ai, gjatë një konference për media të hënën, ka thënë se në atë pjesë të vendit qytetarët nuk janë të sigurt të zhvillojnë një jetë normale.
“Sa i përket kryeministrit, ai krejt çka ka bërë është se ka krijuar kaos në ato komuna. Fatkeqësisht po të kishim shtrirje të sovranitetit, do ta kishim përkrah, por në ato komuna nuk ka kushte për punë, nuk ka kushte për asgjë, pra atje nuk është njeriu i lirë me dalë me ble diçka në market, sepse janë të kërcënuar nga bandat me gjasë që kanë zbarkuar nga Serbia. Nuk ka krijuar gjendje më të mirë, krejt çka ka bërë e ka reduktuar sovranitetin në oborret e katër komunave. Policia është për të siguruar rend dhe ligj në tërë territorin”, ka thënë ai, raporton Dukagjini.
Tutje, ai ka deklaruar se kërkesat e Listës Serbe që Policia e Kosovës të tërhiqet nga veriu janë absurde.
Por, ai nuk ka treguar nëse dy kryetarët e kësaj partie në veri do të japin dorëheqje për të mundësuar mbajtjen e zgjedhjeve të reja.
Sipas tij, qëndrimi i kësaj partie është që çdo vendim të merret në koordinim me Shtete e Bashkuara të Amerikës.
Po ashtu, ai ka thënë se nuk duhet që të cenohet rendi kushtetues, sepse cenohet edhe pavarësia e vendit.