Asociacioni i Gazetarëve të Kosovës (AGK) ka reaguar ndaj deputetit të Lëvizjes Vetëvendosje (LVV), Artan Abrashi i cili ka përdorur gjuhë linçuese ndaj mediumit “Albanian Post”.
Abrashi pas publikimit të shkrimit që paralajmëron sanksione të mundshme kundër kryeministrit të Kosovës, Albin Kurti dhe të tjerëve rreth situatës së krijuar në veri të vendit, ka përdorur gjuhë linçuese.
“Për sanksione ndaj Kosovës po flet portali i Stanishiqit në shqip. E ka emrin Albanian po nuk ka asgjë shqiptare në të”, ka shkruar deputeti në Facebook.
Asociacioni i Gazetarëve të Kosovës me anë të një njoftimi po ashtu në Facebook ka dënuar ashpër gjuhën e përdorur nga deputeti i LVV-së, Artan Abrashi, duke shtuar se një etiketim i tillë është i rrezikshëm për sigurinë e gazetarëve.
“Asociacioni i Gazetarëve të Kosovës e dënon ashpër gjuhën e përdorur nga Abrashi, dhe konsiderohen se një etiketim i tillë rrezikon seriozisht sigurinë e të gjithë gazetarëve, dhe punonjësve të tjerë të këtij mediumi”, thuhet në reagim.