Ministri i Bujqësisë, Faton Peci në fundjavë ka vizituar fermerët në rajonin e Gjakovës.
Ai ka thënë se ministria të cilën e drejton është e përkushtuar që të avancojë politikat mbështetëse për bujqit.
“Ciklin e vizitave të fundjavës e përfundova tek familja Bezhani në Smolicën heroike në Rajonin e Rekës së Keqe. Kjo familje posedon fermën me 40 krerë gjedhe, si dhe mbjellë 17 hektarë tokë, prej të cilave 5 hektarë me grurë dhe 12ha me miser. Kryefamiljari Ibrahimi, përmes bashkëbisedimit më njoftoi nga afër me veprimtarinë e tij”, ka thënë Peci.
Ai më tej në rrjetin e tij social ka shkruar se “Ministria të cilën e drejtoj është e përkushtuar në avancimin e vazhdueshëm të politikave përkrahëse për bujqit meritorë. Bujqësia më assesi nuk duhet të shihet e as të trajtohet si punë zori, por si një degë fitimprurëse në kuadër të zhvillimit ekonomik të vendit”.