Kryeministri i Kosovës, Albin Kurti, në adresimin e mbledhjes së Qeverisë së Kosovës ka filluar me falënderimet ndaj mërgatës.
Ai ka falënderuar mërgimtarët për përkushtimin e tyre në ruajtjen e traditave, rolin në zhvillimin ekonomik, social dhe politik të Kosovës.
Sipas tij, Kosova pa mbështetjen e diasporës nuk do të kishte progres në forcimin e shtetit, progres ky, siç thotë ai, ndihet në të gjithë sektorët e vendit.
“Ecja jonë e shpejtë drejt forcimit të shtetit është më e lehtë kur e kemi mbështetjen e juaj, kontributi juaj ndihet në gjithë sektorët e vendit, ne u jemi përjetësisht falënderues, siç mund ta dini, kemi filluar me shtrimin e rrugës Prishtinë-Podujevë, nuk është rruga vetëm për Llapin, por edhe për mërgatën”, ka thënë Kurti.
Ai ka përmendur edhe nisjen e punimeve në rrugën Prishtinë-Podujevë, e cila, sipas tij, nuk është vetëm për qytetarët e Podujevës, por edhe rrugë e mërgatës.
“Siç mund ta dini, kemi filluar me shtrimin e rrugës Prishtinë-Podujevë, nuk është rruga vetëm për Llapin, por edhe për mërgatën. Për të siguruar që koha juaj në vendlindje do të jetë e këndshme. Këtë duhet ta bëjë republika dhe këtë po e bëjmë së bashku”, ka vijuar Kurti.
Ndryshe, të enjten e 29 qershorit kanë filluar punimet në të gjitha llotet në projektin e rrugës Prishtinë – Podujevë.