Komuna e Prishtinës ka njoftuar se drejtoria e Administratës, si pjesë e reformave administrative, ka filluar me zbatimin e projektit për menaxhimin digjital të radhëve në Qendrën për Shërbim me Qytetarë (QShQ).
Kjo iniciativë ka për qëllim t’i përmirësojë shërbimet që ofrohen ndaj qytetarëve.
Sipas njoftimit, në Qendrën për Shërbim me Qytetarë do të jenë në dispozicion nëntë sportele, të cilat do të jenë të dedikuara për pranimin e kërkesave të qytetarëve.
Një nga ndryshimet kryesore është se çdo qytetar që dëshiron të përfitojë shërbimet në QSHQ, do të duhet të nxjerrë një tiketë nga sistemi i menaxhimit të radhëve.
Shërbimet do të mund të realizohen nga ora 08:00 deri në 16:00.
“Duke u bazuar në kërkesat e shumta të qytetarëve, çdo qytetar që do të kërkojë shërbim në Qendrën për Shërbim me Qytetarë, do të nxjerrë tiketën nga sistemi për menaxhimin e radhëve. Këtë shërbim mund ta realizojnë nga ora 08:00 – 16:00, gjë që do t’ua mundësojë shërbime më të shpejta dhe efikase”, thuhet në njoftimin e Komunës së Prishtinës.