Prokuroria Speciale e Republikës së Kosovës tashmë ka konfirmuar arrestimin e kryeshefit ekzekutiv të Bordit të Ndërmarrjes Hidroekonomike “Ibër-Lepenci”, Faruk Mujka dhe Hysen Muzilukaj, këshilltar i ministrit të Bujqësisë, Faton Peci.
Se çfarë iu sekuestrua dy të lartcekurëve pas kontrollit të dy lokacioneve nga Policia e Kosovës, tregon raporti 24-orësh i Policisë.
Përpos 60 mijë eurove, të arrestuarëve u janë sekuestruar telefona, laptopa dhe jo vetëm.
“Më 14.07.2023 janë arrestuar dy të dyshuar meshkuj kosovarë me dyshimin se të njëjtit kanë kryer veprën penale të lart-cekur. Gjatë kontrollit në shtëpitë dhe banesat e të dyshuarve si prova materiale janë konfiskuar: 60.000 euro, 2 telefona, tre llap-topa , një USB dhe dokumente tjera të ndryshme lidhur me rastin”, thuhet në raport.
Tutje, bëhet e ditur se pas intervistimit, dy të dyshuarit janë dërguar në mbajtje me vendim të prokurorit.
Prokuroria bëri të ditur se të dy dyshohen se me dashje e kanë shfrytëzuar detyrën me qëllim të përfitimit të kundërligjshëm të pasurisë. Si “keqpërdorim i pozitës zyrtare” është cilësuar rasti edhe në raportin e PK-së.