Kryeministri i Kosovës, Albin Kurti, ka thënë se pas dakordimit të arritur në Bratislavë për hapat e parë të shtensionimit të situatës në veri, Kosova ka filluar me hapjen e rrugës për zgjedhje të parakohshme.
“Që nga java e kaluar, ne kemi reduktuar praninë e Policisë së Kosovës me 25% në 3 objektet e komunave në veri. Tani po fillojmë të hapim rrugën për zgjedhje të parakohshme. Kosova tashmë po zbaton me mirëbesim marrëveshjen me BE/Ndërmjetësuesit për depërshkallëzim të dakorduar në Bratislavë”, ka shkruar Kurti.
As of last week, we've reduced the presence of @Kosovo_Police by 25% in the 3 northern municipal buildings. Now we are starting to pave the way for early elections. 🇽🇰 is already implementing in good faith the arrangement with the EU/EUSR on de-escalation reached in Bratislava.
— Albin Kurti (@albinkurti) July 18, 2023
Ndryshe, të hënën e 10 korrikut, emisari i BE-së, Miroslav Lajçak dhe zëvendëskryeministri i Kosovës, Besnik Bislimi, njoftuan se janë dakorduar për hapat për shtendosjen e situatës në veri të vendit.
Hapat e dakorduar janë: zvogëlimi i menjëhershëm i prezencës së Policisë brenda dhe përreth ndërtesave komunale, vlerësimi i vazhdueshëm i gjendjes për zvogëlim të mëtejmë të kësaj prezence, nxitje të zgjedhjeve të parakohshme lokale, si dhe vendosja e bazës së nevojshme ligjore.
Tensionet në veri të Kosovës nisën më 26 maj 2023, kur kryetarët e rinj të Zveçanit, Leposaviqit dhe Zubin Potokut, hynë në ndërtesat komunale me asistimin e Policisë.
Për të kundërshtuar këtë, serbët lokalë kanë mbajtur protesta. Më 29 maj, nga përplasja e protestuesve me pjesëtarët e KFOR-it kanë mbetur të lënduar dhe plagosur 30 pjesëtarë të KFOR-it.