Ish-kryeministri i Kosovës, Avdullah Hoti, njëherësh deputeti i Lidhjes Demokratike të Kosovës (LDK), ka kritikuar qeverinë për dështim total në investime kapitale.
Hoti përmes një postimi në Facebook, ka thënë se po përsëritet situata e kaluar, duke theksuar se “afro 70% e projekteve të parapara për këtë vit nuk kanë filluar”.
Sipas Hotit, në periudhën janar-qershor 2023, nga rreth 850 projekte kapitale në nivelin qendror, 70% të projekteve as nuk kanë filluar dhe janë me 0% realizim.
“Dështim total në investime kapitale: Rreth 70% e projekteve të parapara për 2023 as nuk kanë filluar. Po përsëritet situata e vitit të kaluar. Në periudhën janar-qershor 2023, nga rreth 850 projekte kapitale në nivelin qendror, 70% të projekteve as nuk kanë filluar dhe janë me 0% realizim”, ka shkruar Hoti.
Sipas tij, në periudhën janar-qershor 2023, është shpenzuar vetëm 18% e buxhetit për investime kapitale.
“Shpenzimet kapitale sipas organizatave buxhetore janë shqetësuese: Ministria e Bujqësisë 0%, Ministria e Pushtetit Lokal 0%, Ministria e Shëndetësisë 2%, Ministria e Ekonomisë 4%, Ministria e Drejtësisë 4%, Ministria e Kulturës, Rinisë dhe Sportit 5%, Ministria e Tregtisë dhe Industrisë 10%, Ministria e Arsimit dhe Shkencës 14%, Shërbimi Spitalor 12%, Ministria e Infrastrukturës 16%”, ka vijuar ai.
Ai ka thënë se sikurse në dy vjetët e kaluara, edhe këtë vit, “ekonomisë do t’i mungojnë qindra miliona euro qarkullim në mungesë të realizimit të investimeve kapitale”.