Policia e Shqipërisë dhe Policia e Kosovës kanë finalizuar operacionin policor të koduar “Pengmarrje”, dhe kanë arritur të arrestojnë në Kosovë 29-vjeçarin Aldo Majnishta, i lindur në Shkodër, i cili ishte shpallur në kërkim ndërkombëtar.
Policia e Shqipërisë njofton se në bazë të informacioneve ndërmjet Interpol Tiranës dhe ILECU-së në Kosovë, u bë i mundur arrestimi i 29-vjeçarit me qëllim ekstradimin e tij në Shqipëri.
“Si rezultat i shkëmbimit në kohë të informacioneve ndërmjet Interpol Tiranës dhe ILECU-së, Kosovë, informacione këto të siguruara nga strukturat e Policisë, për një shtetas të kërkuar që qarkullonte në Kosovë, me dokumentet e një shtetasi tjetër, në kuadër të operacionit “Pengmarrja”, u bë i mundur lokalizimi, kapja dhe arrestimi me qëllim ekstradimin drejt vendit tonë, i shtetasit të shpallur në kërkim ndërkombëtar Aldo Majnishta, 29 vjeç, lindur në Shkodër”, njofton Policia e Shqipërisë.
Policia njofton se i arrestuari në momentin e kapjes ka paraqitur pranë institucioneve kosovare dokumentet e një shtetasi tjetër. Si rezultat i bashkëpunimit të Interpol Tiranës me institucionet kosovare, janë kryer një sërë verifikimesh nga të cilat ka rezultuar se shtetasi i kapur gjatë operacionit ishte Aldo Majnishta.
Në njoftimin e Policisë së Shqipërisë thuhet se Gjykata e Posaçme kundër Korrupsionit dhe Krimit të Organizuar, në vitin 2022, i ka caktuar 29-vjeçarit masën e sigurisë “Arrest në burg”, për veprat penale “Rrëmbimi ose mbajtja peng e personit”, kryer në bashkëpunim, “Trafikimi i narkotikëve”, kryer në bashkëpunim, “Prodhimi dhe mbajtja pa leje e armëve, armëve shpërthyese dhe municionit” dhe “Fshehja ose asgjësimi i kufomës”.
Ky shtetas ishte shpallur në kërkim pasi nga hetimet ka rezultuar se është njëri nga organizatorët e rrëmbimit dhe zhdukjes së shtetasit J. P.
“Gjithashtu, këtë shtetas Gjykata e Apelit të Shkodrës, në vitin 2016, e ka dënuar me 3 vjet burgim (nga të cilat i kanë mbetur për të kryer 2 vjet, 3 muaj dhe 15 ditë burgim), për veprat penale “Shkelja e rregullave të qarkullimit rrugor “, “Mosbindja ndaj urdhrit të punonjësit të policisë së rendit publik”, “Prodhimi dhe mbajtja pa leje e armëve, armëve shpërthyese dhe municionit” dhe “Largimi nga vendi i aksidentit”. Interpol Tirana, në bashkëpunim me autoritetet kosovare, vijon procedurat për ekstradimin e këtij shtetasi drejt Shqipërisë”, thuhet tutje në njoftim.