Këtë të hënë do të nisë zyrtarisht funksionim i Dhomës së Monitorimit të Zhurmave dhe pajisjeve për matjen e zhurmës.
Monitorim i zhurmës është instaluar në lokalet e Gastronomisë në Prishtinë.
Zyra pritet që punimet t’i nisë në objektin e Inspektoriatit të Kryeqytetit nga ora 10:30.
Komuna e Prishtinës, në bashkëpunim me përfaqësues të gastronomëve, ka bërë një rregullore sa i përket zhurmës në kryeqytet dhe tash e disa muaj janë duke u njoftuar bizneset me dënimet që janë paraparë për ato lokale që nuk vendosin pajisjet për matjen e zhurmës, si dhe nuk respektojnë atë rregullore.
“Nesër, e hënë, 21.08.2023 në ora 10:30, në objektin e Inspektoratit të Kryeqytetit do të nisë edhe zyrtarisht funksionimi i Dhomës së Monitorimit të Zhurmave brenda lokaleve të Gastronomisë”, thuhet në njoftimin e komunës.
Ndërsa, kryetari i Prishtinës, Përparim Rama, ka paralajmëruar gjobitje për lokalet që nuk respektojnë decibelët e lejuar.
Ai ka thënë se gjobat do të sillen nga 500 deri në 5.000 euro.
“Nga e hëna fillojmë edhe zyrtarisht punën dhe duke u bazuar në rregulloren e miratuar në Kuvend, të gjitha lokalet e gastronomisë në kryeqytet, të cilat nuk respektojnë decibelët e lejuar do të gjobiten”, kishte shkruar Rama në Facebook.
Ndryshe, në Ligjin për Ndotjen Akustike thuhet se “Mbrojtja nga zhurma dhe sigurimi i zbatueshmërisë së saj është detyrë e institucioneve qendrore, njësive lokale, personave fizikë e juridikë dhe qytetarëve.