Arbërie Nagavci, Ministre e Arsimit, Shkencës dhe Teknologjisë (MASHT), ka dhënë detaje në ditën e parë të aplikimit për tekste shkollore.
Ajo përmes një postimi në faqen e saj zyrtare në Facebook, ka treguar se deri në orën 19:00 kanë aplikuar gjithsej 11.800 prindër ose kujdetar ligjorë.
“Deri në ora 19:00 kanë aplikuar gjithsej 11,800 prindër ose kujdestarë ligjor. Mundësia për të aplikuar do të jetë e hapur deri në fund të muajit shtator, me qëllim që asnjë nxënës të mos mbetet pa u pajisur me tekste shkollore”, ka shkruar Nagavci.
Nagavci gjithashtu ka treguar se ka kërkuar nga Drejtoritë e Arsimit të publikojnë listat e librave të zgjedhura nga aktivat profesionale, në mënyrë që prindërit të kenë njohuri se qfarë librash t’i blejnë për fëmijët e tyre.
“Nga Drejtoritë komunale të arsimit kemi kërkuar që listat për tekstet mësimore të zgjedhura nga aktivat profesionale, t’i bëjnë publike në shkolla dhe në uebfaqet e tyre, ashtu që prindërit të kenë të dhënat e nevojshme për tekstet që do të blejnë për fëmijët e tyre. Jemi të njoftuar poashtu se mësimdhënësit tashmë kanë filluar t’i ndajnë këto lista me prindërit”, ka thënë Nagavci.
MASHT-i sot ka hapur aplikimin për subvencionimin e prindërve me nga 80 euro për blerjen e teksteve shkollore, për fëmijët e tyre.