Nënkryetari i Kuvendit të Kosovës nga radhët e PDK-së, Enver Hoxhaj, ka reaguar pas kundërshtimit të Lëvizjes Vetëvendosje për të futur në rend të ditës Rezolutën e propozuar nga PDK-ja për fuqizimin e Policisë së Kosovës.
Hoxhaj në seancën e Kuvendit të Kosovës tha se ky veprim i shumicës parlamentare është absurd.
“Sot ishte absurde që të shohim që shumica qeverisëse, shumica parlamentare nuk do të bëjë asnjë veprim në mbështetje të Policisë së Kosovës sa i takon shtesës së rrezikshmërisë, por edhe pensionimit të parakohshëm të tyre”, ka thënë Hoxhaj.
Hoxhaj tha se kjo rezolutë nuk ishte asgjë tjetër, veçse unitet, të cilin po e kërkojnë qytetarët e Kosovës dhe çdo shqiptar.
“Kërkoj nga ju si shumicë parlamentare të vendosni në seancën e ardhshme në rend të ditës një rezolutë të tillë, e cila duhet ta reflektojë realitetin e ri të Republikës së Kosovës”, ka shtuar ai.