Stuhitë e forta të shoqëruara me tornado në Paderborn shkaktuan dëme të mëdha materiale.
Sipas oficerëve të këtij qyteti, tornado ka hequr çatitë dhe mbeturinat janë shpërndarë përreth për kilometra të tëra.
Dhjetë persona kanë pësuar lëndime të rënda, ndërsa jeta e një gruaje është në rrezik, thanë ata.
Si pasojë e stuhive të forta që goditën rajonin të premten, ka humbur jetë një burrë 38-vjeçar.
Mediat lokale cituan policinë të cilët kanë thënë se 38-vjeçari vdiq në qytetin Wittgert, rreth 180 km në jugperëndim të Paderborn. Ai pësoi një goditje elektrike në një bodrum të përmbytur, raporton BBC.
Policia postoi imazhe që tregonin pemë të ndara përgjysmë dhe çati të zhveshura nga pllakat.
“Llamarina, izolimi dhe materiale të tjera u hodhën me kilometra larg. Çatitë e panumërta janë të mbuluara ose të dëmtuara rëndë. Shumë pemë ende shtrihen mbi makina të shkatërruara,” ka thënë policia në Paderborn, e cila ka një popullsi prej rreth 150,000 banorësh.
Prezantuesi i BBC Weather, Chris Fawkes, ka thënë se Gjermania zakonisht përjeton disa tornado në vit, por shumica janë jetëshkurtër dhe nuk shkaktojnë dëme të konsiderueshme.
Ai tha se numri i tornadove të raportuara në Evropë është rritur vitet e fundit.
“Përsa i përket nëse ndryshimi klimatik po luan gjithashtu një rol, kjo është ende një temë debati,” ka thënë ai.