Edhe pse salla e Kuvendit të Shqipërisë është në errësirë, ish-kryeministri Sali Berisha, së bashku me disa prej deputetëve të opozitës, ka vendosur të qëndrojë në parlament, madje është futur live në rrjetet sociale ku po përcjell mesazhet e tij.
“Kjo është dita e parë e betejës së opozitës”, ka shkruar Berisha në rrjetin social Facebook.
Qëllimi, sipas tij, është rikthimi i parlamentit në “shinat e Kushtetutës dhe ligjit”.
“Parlamenti ka asgjësuar opozitën, sot nisim qëndresën tonë në sallë për t’u ndalë deri në triumfin e Kushtetutës, ligjit dhe votës së lirë të shqiptarëve”, ka theksuar Berisha.
Ndryshe, bllokimi i Kuvendit nga deputetët demokratë ka sjellë dështimin e zhvillimit të seancës plenare në Shqipëri të enjten.
Demokratët në opozitë ditë më parë kanë paralajmëruar qëndresë në seancë plenare, pas rrëzimit që mazhoranca i bëri tri kërkesave të tyre për ngritjen e komisioneve hetimore, përbërjes së komisionit të reformës elektorale, si dhe përjashtimit të deputetëve nga punimet e Kuvendit.
PD-ja, ndër të tjera, ka njoftuar se “prej dy muajsh edhe pse mazhoranca (PS) ka njohur vullnetin e shumicës së deputetëve për kryetarin e Grupit Parlamentar të PD-së, që sipas rregullores së Parlamentit zgjidhet nga vetë deputetët, vijon të lexojë seancë pas seance shkresa të firmosura nga Lulzim Basha”.