Policia e Kosovës ka dhënë detaje lidhur me plagosjen e tre personave mbrëmë në lagjen “Lakrishtë” në Prishtinë.
Policia ka njoftuar se të plagosurit janë të mitur.
Sipas raportit 24-orësh të policisë, të njëjtit janë duke u trajtuar në Qendrën Klinike Universitare të Kosovës, pasi janë qëlluar me armë zjarri nga dy të dyshuar që gjenden në arrati.
“Rr. Bill Klinton, Prishtinë, 20.10.2023-18:44. Tre viktima meshkuj kosovarë-të mitur, janë duke u trajtuar në QKUK, pasi që të njëjtit janë qëlluar me armë zjarri nga dy të dyshuar meshkuj kosovarë”, thuhet në raportin 24-orësh.
Lajmin për Portalin Dukagjini e kishte konfirmuar zëdhënësja e Policisë së Kosovës për rajonin e Prishtinës, Flora Ahmeti.
Lexo dhe: Plagosen tre persona në Prishtinë
“Sot rreth orës 19:00 policia ka marrë informatën për një plagosje me armë zjarri të ndodhur në lagjen ‘Lakrishte’ në Prishtinë. Bazuar në të dhënat fillestare dyshohet se me armë zjarri janë plagosur tre persona, të cilët janë dërguar për tretman mjekësor”, kishte thënë Ahmeti.