Zllatan Ellek do të jetë kryetari i ri i partisë më të madhe serbe në Kosovë.
Ai u zgjodh gjatë një votimi të hapur në seancën e Kuvendit të Listës Serbe(LS), të mbajtur të martën në Mitrovicën e Veriut, ku Lista Serbe zgjodhi edhe kryesinë e re.
Lider i Listës Serbe deri më tani ishte Goran Rakiq.
Por, kush është Zllatan Ellek?
Në maj të vitit 2020, Qeveria e Serbisë emëroi Zllatan Ellekun ushtrues detyre të drejtorit të Qendrës Spitalore Klinike në Mitrovicën e Veriut. Ky institucion, sikurse institucionet e tjera shëndetësore në mjediset e banuara me serbë në Kosovë, punon në sistemin serb.
Ndërkohë, Elleku mori pjesë në tubimet e organizuara nga Lista Serbe, duke përfshirë edhe atë të 6 nëntorit 2022, një ditë pas largimit të serbëve nga institucionet e Kosovës në veri.
Ai më pas në fjalimin e tij tha se “ne mbijetuam falë mbështetjes së lidershipit tonë, në radhë të parë presidentit Aleksandar Vuçiq”.
Së fundmi, ai ka theksuar se për shkak të “terrorit të Kurtit”, institucionet shëndetësore në zonat serbe në Kosovë po kërcënohen nga “katastrofa humanitare”.
Ai ka thënë se autoritetet e Kosovës nuk lejojnë importin e barnave dhe të materialeve mjekësore, gjë që Ministria e Shëndetësisë e Kosovës e ka mohuar, raporton REL.
Zllatan Ellek ia zë vendin Goran Rakiq-it
Deri sot, kryetar i Listës Serbe ishte Goran Rakiq. Ky i fundit ishte zgjedhur lider i Listës Serbe në vitin 2017.
Rakiq, ishte edhe kryetar i Mitrovicës së Veriut për dy mandate dhe po ashtu në të kaluarën mbante edhe pozitën e zëvendëskryeministrit të Kosovës dhe po ashtu ministër për Komunitete dhe Kthim.
Rakiq kishte dhënë dorëheqje nga pozita e ministrit në maj të vitit të kaluar. Ky vendim kishte ardhur pas suspendimit të drejtorit të Policisë së Kosovës për rajonin e veriut, Nenad Gjuriq, i cili ka refuzuar që të zbatojë vendimin e Qeverisë së Kosovës për riregjistrimin e makinave që kanë targa të lëshuara nga Serbia në RKS – Republika e Kosovës.
Goran Rakiq, njihet si kundërshtues i pavarësisë së Kosovës dhe njeri i afërt i partisë së presidentit të Serbisë, Aleksandër Vuçiq.
Së fundmi, Rakiq ka këkruar zgjedhje të parakohshme në katër komunat veriore të Kosovës, duke bërë të ditur se Lista Serbe kësaj here nuk do t’i bojkotojë ato.
Dorëheqja e Radojçiqit, shkak për “ndryshimet” në Listën Serbe
Këto zhvillime brenda Listës Serbe, vijnë pas dorëheqjes nga kjo parti të kriminelit Millan Radojçiq, i cili i udhëhoqi sulmet terroriste në Banjskë të Zveçanit.
Lista Serbe ditë më parë ka kërkuar dorëheqjen e kryetarëve aktualë të komunave veriore, në mënyrë që të ketë zgjedhje të parakohshme.
Radoiçiq ishte zgjedhur nënkryetar i Listës Serbe pak muaj pas vrasjes së politikanit serb nga Kosova, Oliver Ivanoviq.
Presidenti i Serbisë, Aleksandar Vuçiq, e ka cilësuar Radojçiqin si mbrojtës të Serbisë në Kosovë në disa raste, përfshirë edhe në shtator të vitit 2017.
Në aktakuzën e Prokurorisë së Kosovës për vrasjen e Ivanoviqit, Radojçiq përmendet si udhëheqës i një grupi kriminal, por ai nuk është akuzuar asnjëherë drejtpërdrejt, sepse ka qenë në arrati.
Në dhjetor të vitit 2021, Ministria e Financave e SHBA-së ka futur në listë të sanksioneve Millan Radoiçiqin, Zvonko Veselinoviqin, vëllain e tij, Zharkon dhe dhjetë persona të tjerë të lidhur me ta.
Radojçiq, njihet si kryekrimineli i veriut të Kosovës. Së fundmi kjo është vulosur me sulmin terrorist në Banjskë të Zveçanit, ku vetë e ka pranuar përfshirjen dhe udhëheqjen e sulmit.
Ai tani gjendet në Serbi i lirë.