Deputeti i Kosovës nga radhët e LVV, Eman Rrahmani, ka njoftuar se ka zhvilluar një takim konstruktiv me kryetarin e komunës së Prishtinës, Përparim Rama.
Në këtë takim u diskutuan çështje të rëndësishme për kryeqytetin, duke përfshirë planifikimin dhe zhvillimin në “Kodrën e Trimave”, ndërtimin e unazës së kryeqytetit dhe çështjen e përfundimit të rrugës së re “A”.
Sipas tij, në bisedën e tyre të hapur dhe tejet konstruktive, që të dy shqyrtuan detaje mbi studimin e fleksibilitetit për “Kodrën e Trimave”, projektet që aktualisht janë në zhvillim në këtë zonë, si dhe projektet që priten të fillojnë.
Një temë tjetër e cila u diskutua me rëndësi ishte ndërtimi i unazës së kryeqytetit, sipas Rrahmanit, “i shikuar si një nevojë jetike për funksionimin normal të Prishtinës”.
Po ashtu, u diskutua “çështja e ndërtimit të rrugës së re ‘A’”, një projekt i cili është vonuar dhe është vlerësuar si i rëndësishëm në kryeqytet.
Në këtë kontekst, u theksua nevoja për ta përfunduar sa më shpejt këtë projekt, për ta përmirësuar trafikun dhe qëndrueshmërinë e transportit në Prishtinë.
Rrahmani ka theksuar se Prishtina është e të gjithëve dhe se të gjithë duhet të japin kontributin e tyre për zhvillimin dhe përmirësimin e qytetit.
Ai theksoi se kjo është një detyrë e përbashkët për të gjithë ata që kanë pozita publike, përfshirë deputetë, ministrat dhe Qeverinë, dhe se bashkëpunimi është i nevojshëm për t’i arritur qëllimet e përbashkëta.
Në përfundim, ai bëri një thirrje për bashkëpunim dhe solidaritet ndërmjet tyre, duke cituar shembuj të tjerë si Tirana dhe Shkupi, të cilat kanë shënuar progres të madh në zhvillimin e tyre.