Presidenti i Shqipërisë, Ilir Meta, do të qëndrojë në Kosovë për të marrë pjesë në shënimin e 110-vjetorit të Kuvendit të Junikut.
Këtë vizitë do ta realizojë së bashku me Presidenten e Kosovës, Vjosa Osmani Sadriu, me të cilën do të vendosin lule te busti i heroit Edmond Hoxha, në Junik.
Kuvendi i Junikut u mbajt nga data 21 deri më 25 maj 1912 në Junik, me inciativën e Hasan Prishtinës. Në të morën pjesë 250 delegatë nga Vilajeti i Kosovës, sanxhakët e Dibrës, të Shkodrës dhe të Elbasanit.
Pjesa më e madhe e pjesëmarrësve të Kuvendit vendosën të vazhdohej kryengritja e armatosur, dhe kështu u lidh besa dhe u vendos të ndërmerrej një kryengritje e përgjithshme.
Kuvendi miratoi programin politik i cili përmbante kërkesa për autonominë e Shqipërisë, vendosjen e administratës shqiptare, caktimin e gjuhës shqipe me alfabet kombëtar si gjuhë zyrtare, ngritjen e flamurit shqiptar në gjithë vendin dhe garancinë e Fuqive të Mëdha për plotësimin e këtyre kërkesave.