Postin e Presidentit vazhdon ta mbajë, ndërsa më 26 maj dha dorëheqje nga pozita e kryetarit në Partinë Progresive Serbe apo SNS.
Për herë të parë pas 11 vjetësh kjo parti do të hyjë në zgjedhje pa qenë kryetar i saj, Aleksandar Vuçiqi.
Zgjedhjet nuk janë të zakonshme. Të mekurën e nënshkroi dekretin për shpërndarjen e Kuvendit, dhe kështu Vuçiqi e dërgoi shtetin e tij në zgjedhje të jashtëzakonshme që mbahen më 17 dhjetor. Pos nivelit qendror në zgjedhje shkohet edhe në 65 komuna.
Edhe pse është herët të dihen rezultatet, politikanë shqiptarë nga Lugina e Preshevës janë të sigurt se Vuçiqi do t’i fitojë përsëri zgjedhjet, ndërsa vlerësojnë se shkaktar të këtij procesi janë zhvillimet e brendshme.
“Jo vetëm ky rast por edhe rastet e Belivukut krimit të organizuar, Jovanicës me narkotik, rastet e tjera të cilat janë të inkriminuara nga partia-shtet (partia e Vuçiqit) nga institucionet përkatëse tashmë e kanë legjitimuar dhunën e shtetit”, ka thënë kryetari i PVD-së, dega në Bujanoc, Ragmi Mustafi.
Edhe kryetari i Këshillit për të Drejtat e Njeriut në Preshevë, Belgzim Kamberi mendon se zgjedhjet e reja në Serbi ndërlidhën kryesisht me zhvillimet e brendshme dhe tendencën për një rikonfirmim të fuqisë së Vuçiqit.
Kamberi nuk e përjashton mundësinë që zgjedhjet e reja të kenë lidhshmëri edhe me procesin e dialogut me Kosovën.
“Nuk besoj që kjo ka me u pranu nga ndërkombëtarët sepse dihet tashmë që pushtetin kryesor në Serbi e ka Vuçiqi dhe këto zgjedhje nuk është sa ia pamundësojnë atij për të zbatuar vendimet edhe për të marr vendime. Kështu që edhe nëse Presidenti Vuçiq provon që zgjedhjet me i përdor si shantazh në dialogun Kosovë-Serbi nuk besoj që ndërmjetësuesit ndërkombëtar do t’ia pranojnë këtë shantazh”, ka theksuar Belgzim Kamberi nga Këshilli për të Drejtat e Njeriut.
Në njoftimin e Qeverisë serbe u tha se mbajtja e zgjedhjeve të reja parlamentare në rrethanat ekzistuese do të sigurojë, veç tjerash, “një nivel të lartë të demokracisë dhe uljen e tensioneve midis medimeve të ndryshme në shoqëri”.