Guvernatori lokal, Oleksandr Prokudin, ka thënë se tre persona u vranë dhe gjashtë të tjerë u plagosën, në mesin e të cilëve edhe një foshnjë, gjatë bombardimeve në qytetin jugor të Ukrainës, Herson.
Në fund të vitit të kaluar, trupat ruse e braktisën qytetin e Hersonit dhe bregun perëndimor të lumit Dnjepër, por tani po i granatojnë rregullisht këto zona nga pozicionet në bregun lindor.
Dy persona u vranë dhe katër të tjerë u plagosën gjatë granatimeve në pjesën qendrore të qytetit, tha Prokudin në “Telegram”, shkruan REL.
Në një tjetër mesazh, guvernatori tha se një spital në qytet u sulmua nga rusët, ndërsa më herët të hënën një veturë u qëllua në periferi të Hersonit, ku mbeti i vrarë një person dhe u plagosën një foshnjë dymuajshe dhe nëna e saj.
Ndërkohë, Ushtria e Ukrainës tha të shtunën vonë se situata në lindje dhe në jug të vendit “mbetet e vështirë”, duke përmendur sulmet e shpeshta ajrore dhe raketore ruse, në ditën kur Ukraina e shënoi përvjetorin e parë të çlirimit të qytetit strategjik, Herson.