Hykmete Bajrami, deputete e Lidhjes Demokratike të Kosovës (LDK), në emisionin “FIVE” në RTV Dukagjini ka thënë se projektbuxheti për vitin 2024, prej 3.3 miliardë eurosh, nuk realizohet
“Ky buxhet nuk realizohet, ne e kemi pasur buxhetin prej 3 miliardë e 159 milionë të planifikuara edhe për vitin e kaluar, por nuk është realizuar”, ka thënë Bajrami, duke shtuar se sipas të gjithë indikatorëve ekonomikë, shanset janë të vogla që projektbuxheti i vitit 2024 të realizohet në shumën që është premtuar.
“Është vështirë i realizueshëm, sipas të gjithë indikatorëve ekonomikë, shanset janë të vogla të realizohet në shumën që është premtuar”, ka thënë deputetja e LDK-së.
Deputetja nga radhët e LDK-së, Hykmete Bajrami është shprehur kritikuese ndaj Qeverisë, sepse sipas ish-ministres së Tregtisë, Qeveria Kurti nuk ka asnjë projekt kapital me të cilin identifikohet.
“A e dini sot se cila ishte pyetja që është parashtruar më së shumti prej deputetëve të opozitës, cili është projekti kapital me të cilin ju identifikohuni. Ne sot nuk e kemi një projekt kapital”, është shprehur deputetja e Lidhjes Demokratike të Kosovës.
Sipas saj, Qeveria aktuale për 15 vjet që ishte në opozitë, ka krijuar një histori që tashmë identifikohet me të.
“Ne e dimë që për 15 vite opozitë, Lëvizja Vetëvendosje ka hyrë në histori me gazin lotësjellës, me protesta, duke i gjuajtur policët me gurë e me tulla…Këta e kanë krijuar një histori sa kanë qenë në opozitë dhe identifikohen me atë, me opozitarizmin e tyre”, ka shtuar Bajrami.
Mes tjerash, Bajrami ka shtuar se Qeveria ka premtuar 160 çerdhe, por ajo ka theksuar se nuk janë ndërtuar as 60 e as 16.
“I kanë premtuar 160 çerdhe, nuk i kanë ndërtuar as 60 e as 16. Nëse e shihni buxhetin, është përplot me çerdhe të planifikuara në këtë buxhet…Krejt janë 2-3 që priten të përfundojnë në vitin 2024”, ka theksuar deputetja e Lidhjes Demokratike të Kosovës (LDK), Hykmete Bajrami.
Këtë të enjte është mbajtur seanca e Kuvendit, në të cilën, është shqyrtuar projektbuxheti për vitin 2024.
Opozita nuk është pajtuar lidhur me këtë çështje.