7 vjet pas ngjarjes që tronditi Kosovën, akoma nuk dihet me saktësi se si ndodhi dhe cilat ishin motivet.
I akuzuari kryesor është kushëriri i Donjetës, Naser Pajazitaj.
Ai ishte prezent edhe në shqyrtimin gjyqësor të së martës.
Trupi gjykues nuk ka lejuar që mediat të xhirojnë pamjet nga kamerat e sigurisë të cilat janë disa prej provave kryesore, në bazë të së cilave Naser Pajazitaj në dy raste ishte dënuar me burgim të përjetshëm.
Në vazhdimin e rigjykimit të katërt, trupi gjykues nuk lejoi xhirimin për shkak se në pamje shihen edhe persona të cilët nuk kanë të bëjnë me rastin.
Kjo e acaroi vëllaun e Donjetës, Shkëlqim Pajazitajn, i cili është ankuar se nuk i posedon pamjet që u transmetuan në Gjykatë.
Mirëpo atë e kundërshton prokurorja e rastit Valbona Dishaj Haxhosaj.
Për shkak të prezantimit të provave, e gjithë pjesa tjetër e seancës nuk është lejuar të inçizohet.
E përgjatë kësaj kohe trupi gjykues prezantoi disa video-materiale të kamerave të sigurisë.
Këto kamera ishin të vendosura në dy shtëpi skaj rrugës që nga Deçani dërgon për në fshatin Strellc.
E në dy rastet, në kohën kritike kur dyshohet të ketë ndodhur fillimi i ngjarjes tragjike për Donjeta Pajazitjan, shihet teksa kalon vetura Jeep e të akuzuarit Naser Pajazitaj.
Madje, në njërën prej pamjeve shihet vetura teksa ndalet dhe më pas vazhdon lëvizjen në shpejtësi më të madhe.
Këtë në procesverbal e konstatoi edhe gjyqtari Ibrahim Idrizi.
Me këtë konstatim të trupit gjykues nuk u pajtua avokati i Naser Pajazitajt, Gëzim Kollçaku.
E përveç materialeve nga kamerat e sigurisë, me kërkesë të prokurores Disha Haxhosaj është lëshuar edhe një video tjetër, ku Naser Pajazitaj shihet teksa shtien në ajër me revole.
Prokurorja Haxhosaj pretendon se ka dyshime se me atë revole është kryer edhe vrasja e Donjeta Pajazitaj.
Prandaj, ka kërkuar ekzaminime shtesë në këtë drejtim.
E gjatë së mërkurës, trupi gjykues, bashkë me prokuroren dhe mbrojtjen e të akuzuarit do të dalin në vendin ku ishte gjetur trupi i Donjetës.
Kjo ishte një kërkesë në aktgjykimin e Gjykatës Supreme, në bazë të së cilit rasti u kthye për herë të tretë në rigjykim.