Analisti Ylli Hoxha ka thënë se ideja e kryeministrit të Kosovës, Albin Kurti, për bashkimin e Kosovës me Shqipërinë, është futur në sirtar.
Në emisionin “Debat Plus” në RTV Dukagjini, Hoxha ka thënë se ky projekt mund të jetë i mundur vetëm si projekt suksesi.
“Parimisht një shtet i pavarur dhe një shtet tjetër i pavarur o të duhej ta gëzonte këtë të drejtë. Ajo që mendoj që është jokorrekte është që në emër të saj të vihet në pushtet e pastaj në pushtet të harrohet. Është e pamjaftueshme kjo që e bën Kurti. E ka harruar në momentin që kur ka hyrë dhe nuk ka ndonjë nismë serioze për ta bërë, është hyrë në sirtar si ide”, ka thënë Hoxha.
Hoxha vlerëson se kreu i ekzekutivit pas marrjes së pushtetit ka ndërruar qëndrim lidhur me bashkimin kombëtar.
“Është ndryshim i platformës, qëndrimit, posa hyn në zyre të kryeministrit nuk e ke më lirinë e të shprehurit qysh e ke pasur në opozitë. Nuk ka qenë pengesë vetëm neni kushtetues për bashkimin e Kosovës me Shqipërinë, sepse edhe para atij neni nuk jemi bashkuar me Shqipërinë… Ky projekt mund të jetë i mundur vetëm si projekt suksesi i dy shteteve të forta që mund të bashkohen e jo si projekt i një dështimi, sepse janë 2 mundësi se si mund të bashkohen shqiptarët, e para është dy shtete të suksesshme ose edhe një prej shteteve të dështuara që mund t’i bashkëngjitet si copëz pjesës tjetër”, shtoi ai.