Asociacioni i Gazetarëve të Kosovës (AGK) ka deklaruar se është tejet i shqetësuar si pasojë e zhvillimeve nga protesta e PSD-së kundër Ekaterina Trendafilova – kryetare e Dhomave të Specializuara të Gjykatës Speciale, ku sipas tyre, është hedhur sprej dhe gaz lotsjellës në drejtim të gazetarëve.
Siç ka njoftuar AGK-ja, nga ky veprim i Policisë kanë pësuar Elmedina Ballazhi dhe Pleurat Salihu, i cili edhe është alivanosur, Hasan Hoti dhe Rrahman Osmani, si dhe të tjerë.
AGK ka thënë se sjellja e Policisë është e papranueshme dhe e dënueshme, duke bërë thirrje që të respektohet puna e gazetarëve dhe të mos pengohen në kryerjen e detyrave të tyre profesionale.
“Për Asociacionin e Gazetarëve të Kosovës, kjo sjellje e Policisë së Kosovës është absolutisht e papranueshme dhe e dënueshme, andaj i bën thirrje që të respektojë punën e gazetarëve, si dhe të mos i pengojë ata gjatë kryerjes së detyrave të tyre profesionale. Njëherësh, u bëjmë thirrje kolegëve që raportojnë nga terreni të bartin me vete ID-të e tyre të punës, si dhe jelekët me mbishkrimin PRESS, ashtu që të identifikohen që janë punonjës të medieve, e jo protestues”, thuhet në njoftim.