Gjatë ditës së hënë do të mblidhet Këshilli i Mandatave për të shqyrtuar kërkesën e Prokurorisë së Posaçme Kundër Korrupsionit dhe Krimit të Organizuar për heqjen e imunitetit të deputetit, Sali Berisha.
E teksa shqyrtohet kjo kërkesë, opozita ka paralajmëruar protestë.
Kurse, policia shqiptare ka “blinduar” zonën rreth Kryesisë së Kuvendit, ku pritet të mbahet mbledhja për shqyrtimin e kërkesës së SPAK-ut, raportojnë mediet atje.
Rreth 700 forca nga Policia e Tiranës dhe forca e sigurisë kombëtare priten të angazhohen në protestën e thirrur sot nga opozita.
Kujtojmë se SPAK-u ka kërkuar dhënien e autorizimit nga Kuvendi për arrestimin/heqjen e lirisë së deputetit Sali Berisha.
Në shkresën drejtuar Kuvendit, më 12 dhjetor, SPAK-u argumenton se ish-kryeministri nuk ka zbatuar vendimin e gjykatës duke mos u paraqitur asnjëherë para oficerit të policisë gjyqësore/hetuesit.