Përfaqësuesja e Kosovës ka nisur përgatitjet për katër ndeshjet e qershorit për edicionin e ri të Ligës së Kombeve.
Përfaqësuesja e Kosovës nën udhëheqjen e përzgjedhësit Alain Giresse, të premtën e 27 majit e kanë mbajtur seancën e parë stërvitore në Kampin Nacional në Hajvali. Në Hajvali do të zhvillohet edhe seanca e pasditës, të premtën në orën 17:30, transmeton Telegrafi.
Në këtë stërvitje kanë marrë pjesë 17 futbollistë dhe pjesa tjetër do t’i bashkohet ekipit ditëve të ardhshme.
Stërvitja e parë ka përfshirë ushtrime fizike, lojë individuale me top dhe vrapime të lehta.
Trajneri francez i përfaqësuesës së Kosovës do të mbajë konferencë për media në orën 14:00, të premtën për të diskutuar rreth grumbullimit, formës së lojtarëve dhe pritjet e tij për ndeshjet e radhës.
Përfaqësuesja e Kosovës do të zhvillojë duelin e parë më 2 qershor, me Qipron, më pas dy ndeshje i luan në shtëpi kundër Greqisë (më 5 qershor) dhe kundër Irlandës së Veriut (më 9 qershor, në fund si mysafire përballet me Greqinë (më 12 qershor).