I pari i LDK-së, Lumir Abdixhiku, ka kaluar një ditë në Pejë, së bashku me kryetarin e kësaj komune, Gazmend Muhaxherin.
“Kur një komunë e një kryetar punon sa një Qeveri”, nis shkrimin e tij Abdixhiku, teksa thur lavde për Muhaxherin në Facebook, tregon se çfarë kanë bërë tërë ditën në Pejë.
“Vizituam punimet e fundit në Çerdhen “Karagaç”, që po bëhej gati për plot 100 fëmijë Një çerdhe moderne, me kushte e standarde që fëmijët e Pejës i meritojnë në plotni. Këtë model do ta replikojmë në secilin qytet tjetër në Kosovë. ‘Rruga e Re’ parasheh ndërtimin e 80 çerdheve të tilla për vetëm katër vjet.
Vizituam më pas dhe dy Qendra të reja, të Mjekësisë Familjare, njërën në Karagaç e tjetrën në Vitomericë. Sërish, modele të shkëlqyera për kujdes primar ndaj qytetarëve. Njëra zëvendësonte një objekt disadekadësh, tjetra ishte risi e banorëve në Karagaç. Të dyja zgjidhnin përfundimisht kapacitetet e kujdesit primar në Pejë. Do t’i përurojmë në ditë të pavarësisë!
Ndër shumë projekte të tjera infrastrukturore që po zhvillohen aktualisht në Pejë, vizituam rrugën turistike Vitomericë – Maja e Zezë; një mrekulli 6 kilometërshe mes bjeshkëve e pasurive të bukura të fala nga Zoti. Projekt kapital që le shenjë mbi gjenerata. Rrugë e re që çanë mes bjeshkëve për shtigje të pashkelura ndonjëherë”, ka treguar Abdixhiku.
Sipas tij, vetëm Muhaxheri dhe qeverisja e LDK-së arrin që t’i shfaqë me zotësi bukuritë që ka Peja.
“Kështu bëhet kur mendon për zhvillim. E vërteta është se pak qytete kanë këso bukuri! E vetëm Gazi dhe qeverisja e LDK-së në Pejë arrin t’i shpërfaqë ato me kaq zotësi”, ka shtuar Abdixhiku.
Abdixhiku ka theksuar se me Muhaxherin e kuadrot që ka kjo komunë dhe komunat e tjera “Rrugën e Re” të LDK-së do ta bëjnë realitet.
“Se Gaz Muhaxheri fiton bindshëm, kjo s’është rastësi. Është punëtor, e bashkëpunëtor i ndershëm, prijës shembullor. Se LDK ka kuadro të tilla, nga ai tek secili drejtor e këshilltar lokal, është thjeshtë bekim.
Me ta, e të tillë gjithandej Kosovës, ‘Rrugën e Re’ do ta bëjmë realitet. Kosova ka nevojë për projekte të mëdha infrastrukturore, për çerdhe, shkolla, spitale e jo vetëm. Kosova, mbi të gjitha, ka nevojë për punë e zhvillim, si përgjigje ndaj popullizmit polarizues e depresionit kolektiv.
E ardhmja është e bukur. Ne kemi gjetur Rrugën e Re. Tani kemi nevojë për secilin prej jush ta bëjmë atë realitet”, ka përfunduar i pari i LDK-së.