Kryetari i Lidhjes Demokratike të Kosovës, Lumir Abdixhiku, ka akuzuar Qeverinë e udhëhequr nga kryeministri Albin Kurti, për ngritjen e çmimit të energjisë elektrike dhe faturat e larta.
Me anë të një postimi në Facebook, kreu i LDK-së thekson se tarifat e energjisë elektrike, herën e fundit, janë rritur nga prilli i këtij viti.
“Tarifat e energjisë elektrike, herën e fundit, janë rritur nga prilli i këtij viti. Para kësaj, ishin rritur edhe dy herë të tjera. Pra gjithsejtë 3 herë për 3 vjet. Gjendja e tanishme është produkt i mosnjohjes së realitetit qytetar në vend. Siç dhe thoshin vet, ‘qytetarët po shpenzojnë shumë sepse rryma është e lirë’”, shkroi ai.
Qeverinë Kurti, Abdixhiku e cilëson si të paaftë për të qeverisur.
“Do të gjejnë arsyetime; do të ju mbushin me ankesa, nga privatizimi e deri tek luftërat nëpër botë, por e vërteta e vetme është si më poshtë. Paaftësia kushton! Shiheni vet”, shtoi më tej ai.
