Tashmë janë larguar mbetjet e pjesës së kulmit të Komunës së Prishtinës, që ra si pasojë e erërave të forta gjatë ditës së djeshme.
Rrugët për te objekti i komunës janë duke qëndruar edhe më tutje të mbyllura.
Si pasojë e rënies së një pjese të kulmit, është lënduar një 23 – vjeçare, gjendja e së cilës është stabile, por se ka lëndime të rënda.
Shpend Fazliu, zyrtar për informim në Qendrën Klinike Universitare të Kosovës, ka konfirmuar se viktima është 23-vjeçare dhe se pas 4 orësh pritet t’i kryhen ekzaminime shtesë diagnostike dhe të transferohet për trajtim të mëtejmë në Mjekim Intensiv.
“Ju konfirmojmë se një paciente 23 vjeçare është duke u trajtuar në Klinikën Emergjente, me gjendje stabile por me lëndime të rënda trupore. Ekipi emergjent dhe ai klinikave diagnostike ka kryer disa nga ekzaminimet e nevojshme dhe pacientja do të jetë në mbikqyrje mjekësore. Pas 4 orëve pritet t’i kryhen ekzaminime shtesë diagnostike dhe të transferohet për trajtim të mëtejmë në Mjekim Intensiv Qendror”, ka thënë Fazliu.