Policia e Kosovës ka konfiskuar të mërkurën 59 makina për prodhimin e kriptovalutave në dy shtëpi në Mitrovicë të Veriut.
Këtë e ka bërë të ditur për portalin Dukagjini, zëvendësdrejtori i policisë për rajonin e veriut, Veton Elshani.
“Sot në orët e paradites pas pranimit të informacioneve nga qytetarët, policia ka ndërhyrë në dy shtëpi në Mitrovicën e Veriut ne rrugën ‘Çeta e Minatorëve’ dhe ka konfiskuar 59 makina për mihjen e kriptovalutave”, ka thënë Elshani.
Po ashtu, Elshani ka thënë se lidhur me rastin nuk ka të arrestuar.
“Dogana e Kosovës i ka pranuar këto, duke marrë parasysh se kjo është kundërvajtje doganore. Nuk ka të arrestuar”, ka deklaruar Elshani.