Organizata Botërore e Shëndetësisë (OBSH) dhe partnerët çdo vit më 31 maj organizojnë Ditën botërore pa duhan. Qëllimi i kësaj dite është ndërgjegjësimi mbi rreziqet dhe disavantazhet nga përdorimi i duhanit, si dhe ndërmarrja e politikave efektive, të cilat ndihmojnë në uljen e përdorimit të tij.
Dita Botërore pa duhan në Kosovë shënohet nga IKSHPK-ja me moton: “Duhani – kërcënim për mjedisin tonë”. Kjo moto potencon dëmet që shkakton duhani në shëndetin e njeriut dhe në ambientet ku jetojmë.
Duhani është faktor kryesor i rrezikut për sëmundjet jongjitëse, duke përfshirë diabetin, kancerin, sëmundjet kardiovaskulare, sëmundjet e frymëmarrjes e të tjera.
Përfitimet e lënies së duhanit janë mënjeherë të dukshme. Pas 20 minutash pa duhan, ulen rrahjet e zemrës, brenda 12 orësh bie në nivel normal monoksidi i karbonit në gjak, brenda 2-12 javësh, përmirësohet qarkullimi i gjakut dhe rritet funksioni i mushkërive.
Brenda 1-9 muajve zvogëlohen kollitja dhe gulçimi. Brenda 5-15 vjetësh, risku i goditjes në tru bie në nivelin e riskut për persona që nuk e pinë duhanin. Brenda 10 vjetësh, shkalla e vdekshmërisë nga kanceri i mushkërive përgjysmohet krahasuar me atë të duhanpirësve. Brenda 15 vjetësh, risku i sëmundjeve së zemrës bie në nivelin e riskut për persona që nuk e pinë duhanin.
Kur duhanpirësit marrin këshillim intensiv nga mjeku, shanset që ta lënë duhanin janë 84% më të mëdha.
Në nivel botëror, rreth 39% e burrave dhe 9% e grave janë duhanpirës, ndërsa normat më të larta të duhanpirjes janë në Evropë, në nivel prej 26%.