Kryeministri Albin Kurti dhe kryekuvendari Glauk Konjufca kanë pritur në takim përfaqësuesit e opozitës shqiptare në Maqedoninë e Veriut.
Kurti e Konjufca pritën në takim kryetarin i Aleancës për Shqiptarët, Arben Taravarin, së bashku me opozitarët e tjerë shqiptarë, Izet Mexhitin, Afrim Gashin dhe Bilall Kasamin.
Para takimit, Mexhiti ka deklaruar për media se ky është takim vëllazëror.
Ndërsa sa i përket mundësisë së një koalicioni me partinë në pushtet në Kosovë, ai ka thënë se Vetëvendosja nuk është e regjistruar në Maqedoninë e Veriut, por se anëtarët dhe aktivistët e saj në RMV pritet t’i bashkohen partive opozitare.
Kurse, Taravari ka theksuar se beson se do të flasin për zgjedhjet parlamentar të 8 majit me kryeministrin dhe kryekuvendarin.
Kujtojmë se para pak ditësh në RMV është zgjedhur kryeministër teknik, Talat Xhaferi, nga BDI, kështu duke u bërë kryeministri i parë shqiptar në historinë e shtetit maqedonas.