Sirena e alarmit paralajmëron se në çdo moment ju mund të jeni caku i radhës i një sulmi ajror. E pazakonta është kthyer në realitet e përdishtmëri për mbi 38 milionë ukrainas që nga pushtimi rus.
Vuajtje e vëshitrësi përjetojnë të gjithë sidomos nënat, ndër to edhe gazetarja Lyudmila Lukianchenko. Ka gjashtë muaj që jeton në Prishtinë, e çdo mëngjes zgjohet me ankthin se do të pranojë lajme të këqija nga e bija, Lisa dhe nëna, të cilat jetojnë në Kiev.
“Vajza ime qëndron në Kiev, dhe mëngjesi im kur zgjohem fillon duke bisedu me të, fillimisht e pyes si është. Pastaj unë e kam një aplikacion në telefon që tregon për alarmet e bombardimeve në kryqytet dhe në t’gjithë Ukrainën. Në këtë kohë vajza ime së bashku më nënën time, shkojnë nëpër tunele për t’u mbrojtur edhe nuk kanë çasje në rrjet. Por pastaj kur dalin nga tunelet më kontaktojnë mua edhe na tregojnë që janë mirë”, ka deklaruar Lyudmila Lukianchenko, Gazetare nga Ukraina. Dy njerëzit më të rëndësishëm në jetën e saj janë nëna dhe vajza 26 vjeçe.
Madje Lisën figurativisht e cilëson “projektin” më të suksesshëm në jetën e saj. Përshkrimin e ka specialitet, përparësi që e ka fituar përgjatë 16 viteve punë në radion Kombëtare të Ukrainës.
Natën e vitit të ri e festuan në distancë, 2024-ën e nisën të ndara, distancë që nuk e kishin menduar se do ta përjetonin ndonjëherë.
Më herët, ajo dinte shumë pak për Kosovën, por tash e njeh madje më thellësisht se shumë kosovarë, kulturën e natyrën thotë se ka nisur ta pëlqejë, në veçanti ngrotësinë e pritjen që e ndjen në vendin tonë.
“Ju jemi mirënjohës për të gjitha që na ofron Kosova, që Kosova bashkndjen me Ukrainën, edhe e dëgjon zërin e saj. Është shtet kaq i vogël por më një zemër të madhe që na ka hapur të gjitha dyert. Ju faleminderit shumë. Të gjitha fitoret vijnë kur jemi të bashkuar dhe solidar”, ka shtuar Lyudmila Lukianchenko, Gazetare nga Ukraina.
Në kuadër të programit të iniciuar nga Qendra Evropiane për Lirinë e Shtypit dhe Medias, në Kosovë aktualisht janë 13 gazetarë ukrainas, ndërsa 5 të tjerë e kanë përfunduar programin.
Në kuadër të projekti që financohet nga Qeveria e Kosovës e implementohet nga Asociacioni i Gazetarëve të Kosovës, në Kosovë qëndrojnë e punojnë edhe 3 gazetarë afgan.