Presidentja e Kosovës, Vjosa Osmani, këtë të mërkurë ka marrë pjesë në Samitin e Tiranës, “Ukraina dhe Evropa Juglindore”, ku më pas ka zhvilluar edhe një takim me kryeministrin e Shqipërisë, Edi Rama.
Këtë e ka bërë të ditur presidentja Osmani, përmes një postimi në platformën sociale X.
“Sot në Tiranë në takim me Kryeministrin Edi Rama! Diskutime e koordinim në të mirë të Kosovës e të Shqipërisë”, ka shkruar Osmani.
Presidentja Osmani, pas samitit “Ukraina dhe Evropa Juglindore”, ka thënë se fitorja e Ukrainës ndaj Rusisë “është fitore ndaj atyre që duan ta destabilizojnë Ballkanin Perëndimor dhe të rikthejnë mendësinë e dhunës e shkatërrimit”.
Sipas saj, fitorja e Ukrainës “është fitore e lirisë”.
Kosova, sipas saj, “do të qëndrojë me Ukrainën deri në fitore”.