Shefi i grupit parlamentar të Partisë Demokratike të Kosovës (PDK), Abelard Tahiri, pas mbledhjes së Kryesisë së Kuvendit, ka shprehur zhgënjimin për mospjesëmarrjen e kryeministrit të Kosovës, Albin Kurti, në samitin për Ukrainën që u mbajt në Tiranë.
“Me përjashtim të Kosovës, nga një agjendë e tillë është jashtëzakonisht e dëmshme për agjendën tonë evropiane. Unë dua t’ju vë në kujtesën tuaj, por edhe të qytetarëve tanë, se Republika e Serbisë që 16 vjet e ka kundërshtuar prezencën e Kosovës si shtet i barabartë në të gjtha shtetet e rajonit, në mekanizmat ndërkombëtarë, qofshin ato rajonalë apo evropianë”, ka thënë Tahiri.
Tahiri ka thënë se tani kemi ardhur në një pikë ku vetë kryeministri Albin Kurti e përjashton vetën nga këto forume.
“Serbia nuk ka nevojë të angazhohet që Kosova të mos jetë, të mos trajtohet barabartë me shtetet e rajonit në këto mekanizma ndërkombëtarë e forume rajonale, që janë shumë të rëndësishme, edhe për shkaqe sigurie, por edhe për shkak të agjendës sonë drejt integrimit evropian. Sepse është vetë kryeministri i Kosovës ai që e përjashton Kosovën, është një dëm shumë i madh për agjendën tonë evropian, por edhe për sigurinë e vendit dhe rajonit tonë”, ka thënë tutje Tahiri.
Në ndërkohë, kryeministri i Kosovës, Albin Kurti, mbrëmë përmes një postimi ka treguar arsyen se pse nuk mori pjesë në samitin për Ukrainën që u mbajt në Tiranë.
Lexo më shumë: Kurti tregon arsyen se pse nuk mori pjesë në samitin që u mbajt në Tiranë
Përmes një postimi, Kurti ka thënë se përgatitjet dhe dakordimi për vizitën në Mbretërinë e Bashkuar dhe Irlandë ishin bërë në vitin e kaluar, dhe se sipas tij, për këtë arsye nuk ka mundur të marrë pjesë në këtë samit.