Kryetari i Aleancës për Ardhmërinë e Kosovës, Ramush Haradinaj, i ka bërë thirrje grupit parlamentar të Lëvizjes Vetëvendosje që ta ftojë hetuesinë dhe prokurorinë për të hetuar numrin “e madh” të kontratave njëburimore.
Në seancën e Kuvendit ku po diskutohet për Propozim-rezolutën për numrin e madh të kontratave njëburimore, të nënshkruara gjatë mandatit të Qeverisë Kurti, Haradinaj ka thënë se fenomeni i kontratave njëburimore e turpëron qeverinë aktuale.
“Kur shefi ua jep besimin njerëzve të besuar dhe ata me përkrahjen e shefit janë zoti vetë. Nuk kanë nevojë për ligje, rregullore, të frikësohen nga askush se e kanë mbështetjen e shefit. Mund të arsyetohet ndonjë kontratë njëburimore në ndonjë situatë të caktuar, por fenomeni i kontratave njëburimore ju turpëron, ju marron, nuk mund t’i ikni kësaj, i vjen era”, tha ai.
“Meqë nuk doni ta përkrahni rezolutën, ju lutem keni guximin si grup parlamentar, ftoni hetuesinë, prokurorët që të hetojnë numrin kaq të madh të kontratave njëburimore, a ka konflikt interesi, a ka shkelje të ligjeve, a ka humbje të parasë. Duhet ta keni këtë guxim”, shtoi Haradinaj.