400 kilogramë drogë të llojit kokainë ishin kapur në oborrin e një kompanie private në hyrje të Lipjanit në mes të muajit maj.
Policia e Kosovës, kishte njoftuar se kokaina kishte qenë e kamufluar në paketim të mishit të pulës, në kamionin që po e barte atë.
Besnik Berisha, avokat i pronarit të kompanisë në kamionin e të cilit ishte gjendur kjo sasi e drogës, ka thënë se rasti me qëllim po zvarritet për shkak se prokuroria nuk ka prova.
I ftuar në emisionin “Five”, të Rtv Dukagjinit, avokati Berisha, ka thënë se Policia e Kosovës nuk është treguar aspak profesionale në këtë rast.
“13 muaj bëhen prokuroria jonë nuk ngritë aktakuzë, kjo është e kundërligjshme. Cka po ju duhen prokurorisë gjithë këta muaj? Për shkak se nuk kanë prova, vetëm njërit i kanë bërë presion që të deklarojë kundër vullnetit të tij që të tregojë që di diçka dhe ta lirojnë. Prokuroria po punon ta arsyetojë atë spektakël medial, nëse ka ekzistu krimi, 13 muaj ndërton hetim edhe nëse janë krime lufte”, ka thënë ai.
Berisha, është shprehur se klienti i tij nuk ishte fare në dijeni për ekzistimin e drogës në kompaninë apo kamionin që po e transportonte.
Ai ka deklaruar se kjo ka mundur të jetë ndonjë kurthë e pregaditur për të.
“Dy ditë ka qëndru në oborr, as në depo jo, pa e prekë kush, sepse ata kanë qenë në dijeni se ka qenë mish. Kur e morën për ta zbarku mishin, ndërhynë policia e jonë kinse mos të shpërndahej, çfarë do bëhej me to do bëheshin sendvicha e hot doga?”, është shprehur Berisha.
Berisha tha se klienti i tij dhe kompania që ai e drejton është hetuar vazhdimisht dhe se sipas tij nuk është gjetur asgjë e kundërligjshme.