Personaliteti “drama queen” i Ballkanit, Aleksandër Vuçiq, njëherësh president i Serbisë, para pak ditësh ka bërë disa deklarata kërcënuese ku ka theksuar se Perëndimi duhet të zgjedhë mes Kosovës dhe Serbisë. Me tone dramatike, Vuçiq ka thënë se nëse ata zgjedhin Kosovën, atëherë “Serbia do të presë momentin më të mirë të mundshëm dhe ne do ta shfrytëzojmë mundësinë tonë”.
E këtij deklarimi i është kundërpërgjigjur për “Reporterin”, zëvendësndihmësi i Sekretarit të Shtetit, Gabriel Escobar, duke potencuar se Serbia edhe asnjë shtet tjetër nuk mund t’ua përcaktojë fqinjëve të vetë zgjedhjen e aleancave të sigurisë.
“SHBA-ja beson se të gjitha shtetet janë të lira për të përcaktuar vetë politikën e jashtme dhe të zgjedhin aleancat e veta të sigurisë. Asnjë shtet nuk duhet të pretendojë veto ndaj orientimeve strategjike të fqinjëve të vet“, ka thënë Escobar, në një intervistë për këtë gazetë.
Escobar ka komentuar edhe deklarimin e ambasadorit amerikan, Chris Hill, i cili ka thënë se “Serbia është më afër NATO-s sesa Kosova”.
Ai mirëpret angazhimin pozitiv të Serbisë drejt NATO-s dhe në të njëjtën kohë thekson se Kosova ka marrëdhënie të shkëlqyera të sigurisë me shumë aleatë të NATO-s, përfshirë SHBA-në.
“SHBA-ja mirëpret angazhimin pozitiv të Serbisë me NATO-n. Në të njëjtën kohë, ne theksojmë se Kosova ka marrëdhënie të shkëlqyera me NATO-n nëpërmjet KFOR-it dhe NALT dhe ka marrëdhënie të shkëlqyera të sigurisë me shumë aleatë të NATO-s, përfshirë SHBA-në“, ka thënë Escobar.
Kërcënimeve të Vuçiqit iu është përgjigjur edhe ambasadori i ShBA-së në Kosovë, Jeff Hovenier, duke thënë se populli i Kosovës nuk duhet të ndihet i shqetësuar.
Hovenier ka theksuar se NATO, aleanca më e fortë ushtarake, është në Kosovë.
“SHBA ka qëndruar fuqishëm për paqen e njerëzve në Kosovës. Mund të them që jemi të përkushtuar për sigurinë e Kosovës. Ne nuk e humbim gjumin natën duke u shqetësuar për atë kërcënim, sepse ne besojmë që NATO është e gatshme dhe e përgatitur. Dhe nuk mendoj që as njerëzit e Kosovës duhet të mbesim pa gjumë sepse aleanca ushtarake më e suksesshme në histori ka një prezencë të fuqishme dhe është e gatshme të bëjë të nevojshmen.
SHBA mbështet popullin e Kosovës dhe FSK-në, si forcë multietnike për mbrojtje territoriale. Kosova përballet më një sfidë me disa anëtarë të NATO-s që nuk e kanë njohur Kosovën… dëshirojmë ta shohim të ardhmen e Kosovës në NATO. Presim që Kosova të jetë anëtare e plotë e NATO-s”, ka thënë Hovenier.