Deputeti i Lëvizjes Vetëvendosje (LVV), Enver Dugolli ka deklaruar se kryeministri i Kosovës, Albin Kurti bëri mirë që i publikoi pamjet e lëvizjes së disa ushtarëve serbë pak metra larg kufirit me Kosovën.
Sipas deputetit të VV-së, këto pamje pak ditë pas paralajmërimeve kërcënuese të presidentit të Serbisë, Aleksandër Vuçiq sigurisht që duhet të konsiderohen shqetësuese pasi siç thotë ai janë jo të zakonshme.
Në emisionin “FIVE”, Dugolli ka theksuar se me anë të këtyre pamjeve, Kurti ka treguar se gjithmonë ata janë nën përcjellje dhe kurdo që të vërehet ndonjë lëvizje e dyshimtë sërish do të publikohen pamje.
“Kurti e ka publikuar videon për shkak të asaj se lëvizjet e trupave ushtarakë të Serbisë kanë qenë afër kufirit, mirë ka bërë që i ka publikuar për të treguar që jemi duke i përcjellë, që të jetë alarm për Serbinë dhe institucionet brenda, edhe për NATO-n. Pas deklaratave kërcënuese të Vuçiqit, këto lëvizje ushtarake të trupave të Serbisë përreth kufirit me Kosovën janë për tu shqetësuar. Edhe në të ardhmen do të publikohet çdo lëvizje e tyre e dyshimtë”, ka deklaruar Dugolli.
Ndryshe, Kurti tha për herët të parë të enjten pak para mesnatës së ushtria serbe u pa duke lëvizur disa metra larg kufirit me Kosovën, duke i cilësuar ato si “provokime të qëllimshme”.
Sot, Ministria e Mbrojtjes e Serbisë i hodhi poshtë deklaratat e Kurtit duke i cilësuar si “fushatës dezinformuese për ushtrinë e Serbisë”.
Ajo tha se forcat e ushtrisë serbe “janë duke i kryer detyrat e tyre në zonën e sigurt administrative, në përputhje me të gjitha marrëveshjet e nënshkruara”.