Edhe pse rezoluta e Këshillit të Sigurimit të OKB-së për një armëpushim të menjëhershëm të luftës në Gazë u miratua me një shumicë votash, situata në terren vazhdon të jetë e tensionuar.
Luftimet kanë përfshirë bombardimet izraelite në qytetin jugor të Rafahut dhe beteja të ashpra në afërsi të spitaleve në Khan Younis dhe në qytetin e Gazës.
Numri i të vdekurve rritet në Gaza
Numri i të vdekurve në Gaza është rritur në 32 mijë e 414, sipas ministrisë palestineze të shëndetësisë të drejtuar nga Hamasi.
Tetëdhjetë e një persona janë vrarë në 24 orët e fundit, ndërsa 93 të tjerë janë plagosur, thuhet në një deklaratë të ministrisë.
Luftimet po vazhdojnë në Gaza ndërsa Izraeli vazhdon fushatën e tij ushtarake në territor, pavarësisht miratimit të një rezolute të Këshillit të Sigurimit të OKB-së të hënën që bën thirrje për një armëpushim të menjëhershëm.
Sirenat paralajmëruese të raketave janë dëgjuar edhe në qytetet izraelite pranë Gazës, ndërsa qeveria izraelite ka reaguar ashpër pasi aleati i tyre më i ngushtë, SHBA, abstenoi në votimin e rezolutës në Këshillin e Sigurimit të OKB-së, raporton BBC.
Megjithatë, pas votimit, Hamasi ka thënë se po i përmbahej kërkesave të tij për një armëpushim të plotë, duke përfshirë tërheqjen e trupave izraelite nga Gaza dhe kthimin e palestinezëve të zhvendosur.
Megjithatë, zyra e kryeministrit izraelit e përshkroi këtë si “joreale”.
“Rezoluta e OKB-së e ka trimëruar Hamasin”
Bisedimet për arritjen e një marrëveshjeje të armëpushimit po vazhdojnë mes Izraelit dhe Hamasit përmes ndërmjetësuesve në Katar.
Kryeministri izraelit dhe zyra e jashtme kanë dënuar kërkesat e Hamasit për një armëpushim të përhershëm si “iluzive”.
Në këtë kontekst, ministri i Jashtëm izraelit, Israel Katz, ka theksuar se rezoluta e OKB-së për armëpushim ka trimëruar Hamasin duke i sinjalizuar se presioni ndërkombëtar do të bëjë që lufta të përfundojë pa një lëshim të qartë nga ana e tyre.
Raportet sugjerojnë se në kohën e votimit po punohej për një marrëveshje që do të linte në liri disa pengje izraelite në këmbim të të burgosurve palestinezë.
Megjithatë, situata mbetet e ndërlikuar dhe tensionet vazhdojnë të rriten.