Ambasadori amerikan në Serbi, Christopher Hill, të hënën [ 15prill] ka vizituar Fakultetin Filozofik në qytetin e Novi Sadit. Por kjo vizitë e ambasadorit amerikan, Hill dhe e profesorit të Universitetit të Novi Sadit, Dinko Gruhonjiq, nuk u prit edhe aq mirë.
“Plumb për të dy”, është njëri nga kërcënimet që po qarkullon në rrjetet sociale, e që i janë drejtuar ambasadorit Hill dhe Gruhonjiq, pas vizitës së tyre në Universitetin Filozofik të Novi Sadit, raportojnë mediet në Serbi.
Ndryshe, gjatë ditës së djeshme [ e hënë] Fakulteti Filozofik në Novi Sad ka njoftuar se ambasadori amerikan, Christopher Hill, ka vizituar Fakultetin dhe Departamentin e Studimeve të Medias, ku foli me dekanin Ivan Zhivançeviq Sekeruš dhe prodekanin për Bashkëpunim Ndërkombëtar, Zoran Paunoviq. Pas takimit me ta, Hill vizitoi studion televizive multimediale, e cila u ndërtua me ndihmën e Ambasadës Amerikane, raporton N1.
Ambasadori Hill, gjatë qëndrimit të tij në Fakultetin Filozofik, ka folur me mësues dhe studentë, për gjendjen e lirisë së medieve në Serbi dhe kërcënimet e gazetarëve, të profesorëve dhe të studentëve në Novi Sad.