Presidenti i Shteteve të Bashkuara të Amerikës, Donald Trump, ka lidhur trazirat e fundit në Francë me politikat e migracionit, duke i bërë thirrje autoriteteve franceze që t’i mbyllin menjëherë kufijtë e vendit.
“Migrantët e kanë marrë nën kontroll Francën. Duhet t’i mbyllin kufijtë, shpejt”, ka shkruar Trump të hënën në platformën e tij, Truth Social.
Më vonë, duke folur para gazetarëve në Shtëpinë e Bardhë, Trump tha se presidentit francez, Emmanuel Macron, i kishte thënë se po bënte “një gabim të madh” me politikat e migracionit.
“Po lejoni të vijnë të gjithë nga e gjithë bota. E gjithë bota po vinte dhe, siç e dini, Parisi shumë shpejt do të jetë qytet mysliman, e kjo nuk ishte marrëveshja”, deklaroi Trump.
Ai shtoi se i kishte kërkuar Macronit t’i mbyllte kufijtë, duke krahasuar politikat franceze me ato amerikane.
Deklaratat e Trumpit vijnë në kohën kur Franca po përballet me protesta dhe greva në shkallë vendi, të cilat fillimisht nisën muajin e kaluar nga studentët, për shkak të mungesës së mësimdhënësve dhe financimit të pamjaftueshëm të shkollave.
Më pas, protestat u zgjeruan me greva sindikale kundër inflacionit dhe kostos së lartë të jetesës.
Trazirat u përshkallëzuan gjatë fundjavës, kur disa ndërtesa u përfshinë nga zjarri, përfshirë edhe ndërtesën historike të bashkisë në Limoges. Sipas Ministrisë së Brendshme franceze, afro 1.000 pjesëtarë të forcave të sigurisë u lënduan.
Ministri i Drejtësisë, Gérald Darmanin, bëri të ditur të hënën se më shumë se 2.330 persona u ndaluan nga policia në të gjithë Francën gjatë fundjavës.
Ndërkohë, presidenti Macron, në një adresim të dielën në mbrëmje, dënoi atë që e cilësoi si “dhunë të pakontrolluar”, duke ua atribuar përgjegjësinë grupeve radikale të së majtës ekstreme dhe personave të përfshirë në veprimtari kriminale. Ai bëri dallimin mes tyre dhe protestuesve që, sipas tij, kanë kërkesa legjitime.
Kryeministri francez, Sébastien Lecornu, tha të hënën se u kishte udhëzuar autoriteteve rajonale të vendosnin orare të kufizuara ndalim-qarkullimi në zona të caktuara, me synim parandalimin e trazirave dhe plaçkitjeve të mëtejshme.