Në Dhomat e Specializuara të Kosovës në Hagë këtë të hënë do të vazhdojë procesi gjyqësor ndaj ish-krerëve të Ushtrisë Çlirimtare të Kosovës.
Pas një pushimi dyjavësh vazhdon procesi gjyqësor ndaj ish-krerëve të UÇK-së në Hagë.
Seanca do të vazhdojë me dëshminë e dëshmitarit të 54-të në gjykimin ndaj Thaçit dhe të tjerëve, pasi nuk ka përfunduar në seancën e 4 prillit, ashtu siç ishte planifikuar.
Kjo ndodhi me kërkesë të mbrojtjes së Kadri Veselit, Ben Emmerson, pasi i njëjti ka theksuar se ka pyetje shtesë për dëshmitarin pas pyetjeve të trupit gjykues, mirëpo i duhet kohë që të përgatitet.
Po ashtu, as ekipet e tjera mbrojtëse nuk ishin të përgatitura për këtë pjesë të marrjes në pyetje. Megjithatë, kryetari i trupit gjykues, Charles Smith III, ka theksuar se janë të zhgënjyer.
Po ashtu, Smith III ka theksuar se ekziston mundësia që pjesa e mbetur e marrjes në pyetje të dëshmitarit mund të bëhet edhe përmes videolidhjes.
Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.
Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.
Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.